M+ no longer supports this web browser.
M+ 不再支持此網頁瀏覽器。
M+ 不再支持此网页浏览器。
潛空間
焦點——木紋混凝土
兩款粗獷中藏細節的混凝土工藝
旁述：
M+大樓嘅牆身、支柱同地下都採用大量混凝土建成，潛空間將呢啲材料嘅特質，發揮得淋漓盡致。為咗貫徹喺呢一層營造工業風格嘅理念，同埋突出成個地基結構，建築團隊選擇唔遮蓋同修飾混凝土牆身，令到呢個空間有一種未經雕琢嘅感覺。博物館底層俾人嘅印象係粗獷、貼地而且毫無掩飾，呢種風格同位於二樓嗰啲四四方方、有住雪白牆身嘅傳統「白立方」展廳形成強烈嘅對比。
仔細觀察呢個開鑿出嚟嘅地下空間，你會發現兩種唔同樣式嘅混凝土。試吓望向頭上嘅橫樑，同埋顯示地鐵隧道輪廓嘅高架結構，你會見到比較傳統、平滑嘅倒模混凝土，呢種呈現原貌嘅造法叫「清水模」。再望吓另一啲牆身同巨型支柱，你會見到另一種有多啲紋理嘅混凝土板塊，如果你咁啱企喺隔離，可以行近摸下佢嘅表面㗎。
支柱外層嘅混凝土其實係喺原址倒模製作嘅。首先，要準備巨型嘅雙面模板。然後選取啱用嘅粗糙木板，再將佢哋打磨同塗上特別嘅物質，令混凝土成型後木板可以輕易剝落嚟。呢啲木板會釘喺模板入面，然後注入液態混凝土，等待成型。當模板被移除、木板剝落之後，就會留低你依家見到嘅木紋。
喺你去下一站之前，你可能有興趣知道點解混凝土表面會有咁多圓圈嘅「烘」？呢啲叫做「對拉螺栓孔」，係混凝土凝固嗰陣，金屬棒穿過模板兩邊嘅痕跡，用嚟固定結構同確保混凝土嘅負重唔會令模板變型，所以牆身就會有咁嘅效果啦。
本網站使用「Cookies」為你提供最好的網站體驗。
隨時隨地探索語音導賞資料庫，收聽策展人、創作人及受邀嘉賓的介紹，或了解相關作品或建築在視覺上的特徵。
Explore the archived audio guide content at any time and place. Listen to curators, makers, and guest speakers or learn about the key visual elements of different objects and architectural features.
