语音导赏资料库
随时随地探索语音导赏资料库，收听策展人、创作人及受邀嘉宾的介绍，或了解相关作品或建筑在视觉上的特征。
建筑导赏
口述影像
草间弥生：一九四五年至今
105 (广东话)
105 (广东话)
3:11
潜空间
Herzog & de Meuron如何化建筑挑战为特色
旁述：
呢度係M+嘅最底層，B2。有時呢度會用嚟做收費展覽，假如今日你遇上呢種情況，你仍然可以由地下或者B1樓層好好欣賞呢個空間。如果你已經身處B2，不妨靜落嚟，將自己沉澱喺呢個空間之中。
呢個開闊、寬敞、走工業風同啞色色系嘅空間，應該同你去過嘅其他展廳感覺好唔同，呢度叫做「潛空間」，可以話係M+嘅基石同核心。結構而言佢係位處地基，精神上亦都反映緊一個充滿潛力嘅嶄新藝文空間响香港崛起。睇睇上面，博物館樓層就係咁樣一一呈現喺你眼前。
潛空間究竟係點嚟嘅呢？建築團隊當初設計M+呢座大樓嘅時候，佢哋好想構思一個能夠表現出原址獨特之處嘅設計。不過，整個西九文化區嘅土地係填海得嚟，即係話呢度並無之前嘅建築或者歷史呼應，係一塊空白嘅畫布。
但係團隊好快意識到，呢度嘅地底下確實有啲野存在，就係機場快綫同東涌鐵路嘅隧道，打對角咁貫穿地底。初時呢條隧道被視為設計嘅極大挑戰，但係建築團隊立即發現佢正正就係重要嘅特色。於是團隊化身考古學家，決定要挖掘返條隧道出嚟，將佢顯露於人前，然後再以混凝土層架覆蓋。而呢一層嘅其餘空間保留住規劃階段嘅原貌，展示出呢個係一直潛藏而等待被發現嘅空間。
潛空間嘅地板都好特別㗎，成個博物館淨係喺度先搵到呢款「端紋」拼花技術製作嘅橡木地板，同大量運用嘅混凝土形成強烈對比。你可以喺目錄選擇「焦點──木紋混凝土」，深入了解呢種木紋質感。早喺設計概要入面已經清楚列明，博物館要有一種粗獷、後工業風格，呢個決定或者係回應緊20世紀末同21世紀嗰啲規模龐大嘅創作同展覽。潛空間獨特嘅佈局，令創作者同策展人有機會善用唔同嘅空間比例，去構思場域特定嘅作品同展覽。
本网站使用「Cookies」为你提供最好的网站体验。
了解更多加载中